Atur Pasrah Temanten Bade Panggih

Berikut contoh (tuladha) atur pasrah temanten kakuhng bade panggih secara ringkas dan sederhana. Dalam contoh ini saya mewakili pihak keluarga temanten pria yang merupakan adiknya (karena kedua orangtuanya sudah meninggal). 

Dengan segala kekurangan yang ada, semoga materi ini bermanfaat. 

=======

*

Assalamu ‘alaikum Wr.Wb.

Bismillaahirrahmaanirrahiim. Alhamdu lillaahi rabbil ‘aalamin. Wabihi nasta’inu ‘ala umuriddunya waddiin.

-     Para sesepuh pinisepuh ingkang dahat kinabekten

-     Panjenenganipun Bapa Dalmadi dalasan Ibu Sunarti ingkang kinurmatan

-     Para rawuh kakung sumawana putri ingkang bagya mulya

Kanti  ngunjukaken raos syukur dumateng Allah SWT, Gusti Ingkang Maha Agung.

Sowan kula mriki dipun saroyo dening panjenenganipun Bapa Tri Handoko, S.Ag sekalian Ibu Ira Yuli Utami ingkang pidalem wonten Plumbungan Indah, Kelurahan Plumbungan, Kecamatan Karangmalang, Sragen, kanthi ringkes kepareng matur :

Sepisan. Ngaturaken salam taklim saking Bapa Tri Handoko, S.Ag sekalian garwa dumateng Bapa Dalmadi – Ibu Sunarti, lumantar Bapa Ribut Budihardjo, pidalem wonten ing Dukuh Bendo, Desa Bendosari, Kecamatan Sawit, Kabupaten Boyolali, kanthi atur “Assalamu ‘alaikum Wr. Wb.”

Kaping Kalih. Bapak Bapa Tri Handoko, S.Ag sekalian Ibu Ira Yuli Utama, nyowanaken temanten kakung, nun inggih (Keng Rayi) Bagus Aris Hindarko, S.Sos, putra kakung saking Almarhum Bapa Purnawirawan IPTU Edy Subagyo – Almarhumah Ibu Siti Etika, ingkang sampun kalampahan nindakaken Ijab-Qabul, daup kalian Roro Tri Widiastuti , putri saking Bapa Dalmadi – Ibu Sunarti, kala wau enjang, watawis tabuh 08.00, kanthi pinaringan Rahayu Wilujeng, pikantuh berkahing Allah SWT.

Ing wekdal punika, putra temanten, kula sowanaken lan pasrahaken dumateng Bapa Dalmadi sekalian. Saklajengipun, bade kapanggihaken manut satataning adat, widi wadana ingkang lumampah wonten tlatah mriki. Mugi-mugi sedayaninpun saget lumampah kanti lancar, mboten wonten alangan satunggal punapa.

Pangajabing Bapa Tri Handoko sekalian garwa, mugi-mugi putra-putri temanten kekalih mangkenipun saget widodo anggenipun jejodohan lan mbangun bale wisma, mugi dados kulawarga ingkang Sakinah Mawaddah wa Rahmah, pikantuh berkahing Allah SWT, tansah manggih bagya mulya sak lami-laminipun.

Minangka jangkeping tata-krami, kula ugi kinen hangaturaken sawetawis pisungsung ubo rampe, minangka tadha talining katresnan. Sanadyan mboten sepintena, mugi sageta hanambah raketing kekadangan ing antawisipun kulawarga Bapa Tri Handoko saha keluarga Bapa Dalmadi.

Ing wasana. Mboh bilih anggen kula matur kathah kalepatan lan kekirangan, saha anggen kula sowan sak rombongan mboten rena ing panggalih panjenengan, kula mawantu-wantu nyuwun agenging samodra pangaksami.

Dene sak purnaning pawiwahan samangke, kula sak rombongan kepareng nyuwun pamit lan tambahing donga pangestu, mugi lampah kula sak rombongan tansah pinaringan kawilujengan, nir boyo nir ing sambikala, ngantos dumugi griya sowang-sowang.

Nuwun. Billahittaufiq wal hidayah.

Wassalamu ‘alaikum Wr.Wb.

Suparto